როგორც  მოგეხსენებათ, ბათუმის სახელმწიფო  საზღვაო აკადემიასა  და  ლატვიის  საზღვაო აკადემიას  შორის ხელმოწერილი მემორანდუმის თანახმად, აჭარის  ავტონომიური  რესპუბლიკის განათლების, სპორტისა და ტურიზმის სამინისტროს დაფინანსებით და ხელშეწყობით 2016 წლის  3 აპრილიდან  9 აპრილის ჩათვლით ბათუმის სახელმწიფო  საზღვაო აკადემიის პროფესორ-მასწავლებელთა სამუშაო ჯგუფი შემადგენლობით: ციური ყურშუბაძე, ლუიზა სიხარულიძე, შოთა კუნჭულია, ზაზა შუბლაძე, მერაბ ცეცხლაძე- იმყოფებოდა ლატვიის  საზღვაო აკადემიაში, სასწავლო  კონფერენციაში მონაწილეობის მისაღებად და  გამოცდილების გასაზიარებლად.

ლატვიის  საზღვაო აკადემიის   ლექტორატთან სამუშაო შეხვედრისას  მოხდა  სასწავლო საგანმანათლებლო პროგრამების ურთიერთ გაცნობის პროცედურა, დაისახა ურთიერთობების   და  შემოქმედებითი აქტივობის  გეგმები. ბსსა პროფესორ-  მასწავლებლები გაეცნენ „საზღვაო ნავიგაციის“, „გემის მექანიკოსის“,  „ელექტრომექანიკოსის“ და „ნავსადგურებისა და ტერმინალების გადამტვირთავი აღჭურვილობის“ საბაკალავრო საგანმანათლებლო პროგრამების     სწავლების  მეთოდებს და ინოვაციურ წამოწყებებს.

საზღვაო ნავიგაციის მიმართულებით დიდი ყურადღება მიექცა ელექტრონული კარტოგრაფიის სასწავლო ლაბორატორიებს.

გემთმექანიკური მიმართულებით ყურადღება მიექცა თანამედროვე, ვირტუალური ლაბორატორიების გამოყენებას, რომელიც სტუდენტებს დაეხმარება  სპეციალობით სასწავლო დისციპლინების ათვისებაში.

„ნავსადგურებისა და ტერმინალების გადამტვირთავი აღჭურვილობის“ საბაკალავრო საგანმანათლებლო პროგრამის ურთიერთ გაზიარებისას, დაისახა ახალი სამაგისტრო საგანმანათლებლო პროგრამის „ნავსადგურებისა და ტერმინალების ტექნიკური მენეჯმენტის“ ერთობლივი პროექტის განხილვა.