ამა წლის 30 ოქტომბერს კონსტანცაში, რუმინეთი ჩატარდა საზღვაო სასწავლებლების შავი ზღვის ასოციაციის Black Sea Association of Maritime Institutions ყველა წევრის I დამატებითი შეხვედრა. აღნიშნულ შეხვედრას ესწრებოდა ბათუმის სახელმწიფო საზღვაო აკადემიის დელეგაცია.

შეხვედრაზე განიხილეს ისეთი მნიშვნელოვანი საკითხები, როგორიცაა ასოციაციის სტრატეგიული დაგეგმარება და კონტროლი, ასოციაციის ოფიციალური სეკრეტარიატის გახსნა, რაც მოიცავს მთელ რიგ ორგანიზაციულ საკითხებს. აღნიშნულ შეხვედრაზე ადმირალ უშაკოვის სახელობის სახელმწიფო საზღვაო უნივერსიტეტის ასოცირებულმა პროფესორმა, ქალბატონმა ირინა მაკაშინამ წარადგინა პროექტი სახელწოდებით „BSAMI-ს საგანმანათლებლო სივრცე“. აღნიშნული პროექტი მიზნად ისახავს ასოციაციის წევრების თანამშრომლობას საგანმანათლებლო და სამეცნიერო კუთხით, კერძოდ კი პროფესორ-მასწავლებელთა გაცვლით პროგრამას მათი გამოცდილების გაზიარების მიზნით.