საქართველოს განათლების, მეცნიერების, კულტურისა და სპორტის მინისტრის მოადგილე ნუნუ მიცკევიჩი, აჭარის ავტონომიურ რესპუბლიკაში ვიზიტის ფარგლებში, ბათუმის სახელმწიფო საზღვაო აკადემიას ესტუმრა და სასწავლო წლის დაწყებამდე დანერგილ სიახლეებს გაეცნო.

დისტანციური სწავლებისა და საქმისწარმოების პროცესის სრულყოფილად წარმართვის უზრუნველსაყოფად ბათუმის სახელწიფო საზღვაო აკადემიის ელექტრონული პორტალი სრულად იძლევა შესაძლებლობას სინქრონულ და ასინქრონულ რეჟიმში წარიმართოს საგანმანათლებლო პროცესი. ZOOM-ის პლატფორმა, აკადემიურ და მოწვეულ პერსონალს სრულად აძლევს ვიდეო კონსულტაციის ჩაწერის შესაძლებლობას, რომელიც სტუდენტებისთვის ნებისმიერ დროს ხელმისაწვდომია.

 2020 წლის ბოლოსთვის ბათუმის საზღვაო აკადემიას თანამედროვე სტანდარტების საწვრთნელი აუზი ექნება, რომელიც აკადემიის სტუდენტებსა და მოქმედ მეზღვაურებს საშუალებას მისცემს სავალდებულო პრაქტიკული წვრთნები საერთაშორისო საზღვაო ორგანიზაციის (IMO) მიერ შემუშავებული სტანდარტების შესაბამისად გაიარონ. ბათუმის სახელმწიფო საზღვაო აკადემიის ფილიალის მშენებლობა მიმდინარეობს ასევე ფოთში, რომელიც 2021 წლიდან გაიხსნება და ის 1000 სტუდენტზეა გათვლილი.